Zijue Mbinu za Kuvunja Mahusiano yasiyo na Tija Kwako bila Maumivu yoyote.

Na. James Waibina.

Habari ndugu msomaji wa makala zangu katika blog hii ya Fumbuka, karibu tena siku ya leo tuweze kujifunza zaidi kuhusu Ndoa na Mahusiano, leo tutazungumzia mahusiano.

Mahusiano ni sehemu kubwa sana katika kufanikiwa au kutokufanikiwa kwenye maisha yako, kama hauko kwenye mahusiano mazuri unaweza kukuta ndoto zako zinakufa na unashindwa kuwa yule mtu ambae umepanga kuwa kwenye maisha yako, lakini pia kama ukiweza kuyatumia mahusiano vizuri pia yanaweza kuwa sehemu ya kufanikiwa kwenye maisha yako.

Watu wengi sana hasa vijana wako kwenye mahusiano yasiokuwa na tija lakini wanashindwa kujinasua huko kwa kuogopa kuumia au kumuumiza mwenzake na ni kweli unajua muda fulani kwenye maisha unaweza kuwa na mtu ambae umemzoea kabisa anakufanyia mambo ambayo yanakurudisha nyuma lakini unashindwa kumuacha kwasababu unaogopa maumivu, leo katika makala hii nitakufundisha jinsi ya kumuacha mpenzi wako ambae hana tija kwenye maisha yako bila kumsababishia maumivu.

Yawezekana upo katika Mahusiano yasiyo na tija kwako na unashindwa kuvunja mahusiano hayo, Tumia njia zifuatazo kuvunja uhusiano huo:-

1.     Punguza Mawasiliano Nae

Njia ya kwanza kabisa ya kuacha mahusiano yasio na tija bila kusababisha maumivu ni kupunguza mawasiliano, kama mlikuwa mnawasiliana mara tano kwa siku anza kufanya mara tatu kwa siku, baada ya muda fanya mara mbili, baadae tena mara moja, najua utapokea maswali mengi mara ooh mbona siku hizi hunipigiii jibu rahisi tu niko busy au sina vocha, mwisho wa siku atazoea.

2. Punguza Muda Wa Kukutana Nae

Kama mlikuwa mnaonana mara mbili kwa wiki anza kumpa nafasi ya kuonana mara moja kwa wiki, halafu ongeza kazi za kufanya ili hata akisema akutafute yeye atakukuta tu uko kwenye kazi nyingine najua utapokea maswali mengi sana, cha msingi ongea naye vizuri mwambie kuna majukumu yameongezeka mwanzo itakuwa ngumu lakini mwisho wa siku atazoea tu. wewe umeshaona kuwa hayo mahusiano hayakufikishi kwenye ndoto zako.

3. Fanya Mazoezi Sana

Kama ulikuwa huna tabia ya kufanya mazoezi ya viungo anza kufanya mazoezi ya viungo, mazoezi yanakufanya uwe busy muda mwingi na yanakuondolea mawazo yote, hii itakufanya uwe mtulivu sana siku zote.

4. Punguza Matumizi Kwake na Anza Kuweka Akiba

Hapa inabidi uwe mtu wa sina hela,punguza kabisa matumizi kwake halafu anza kuweka akiba,kama ulikuwa unamfanyia manunuzi mara kwa mara punguza halafu weka akiba,ili ikusaidie baadae.

5. Mfanye Awe Rafiki Yako

Ukitaka kuachana na mahusiano yasio na tija haina haja ya kumfanyia visa mwenzako, au kumuonyeshea kuwa humtaki tena hapana inaweza kukuumiza wewe zaidi au ikamuumiza yeye zaidi, maisha siku zote hayaeleweki, unaweza kuona leo mtu hana msaada kwako lakini siku nyingine akawa msaada kwako, sasa msiachane vibaya hata kama umegundua kuwa mahusiano hayo hayakufikishi kwenye ndoto zako, cha msingi wewe mfanye awe rafiki yako, tena ikiwezekana kama ulikuwa unamuita majina ya kimapenzi muda wote anza kumuita rafiki. itakuwa ngumu mwanzo lakini atazoea tu.

6. Anza Kumshauri Sana Kuhusu Maisha Kuliko Mapenzi

Tumia muda wako mwingi kila mnapokutana kuzungumzia maisha na ndoto zenu, mshauri sana kuhusu maisha kuliko mapenzi utaona kuna nguvu fulani hivi ambayo ilikuwa imezoeleka itaanza kupungua siku hadi siku na mwisho wa siku mnaachana kirafiki kabisa na kila mtu anaendelea na maisha yake huku mkiwa mnaongea kama kawaida.

Kwenye maisha usikubali kabisa mahusiano yavuruge ndoto zako na malengo yako ya kimaisha, ukiona tu uko kwenye mahusiano ambayo unaona yanapokupelekea ni kupoteza ndoto zako anza kuyaacha mapema sana.

Ahsante.

Kwa Maoni /Ushauri: Tuwasiliane kupitia

0713515059  -(WhatsApp) au  jameswaibina@fumbuka.co.tz

MAKALA ZETU NDOA NA MAHUSIANO 3:13 PM